nga: Salih  Zogiani
 
Përshkrimi i librit:
Pjesë nga libri "999 Anekdota"

Kish qenë njëri duke lëvruar në arë. Andejpari kapërcejnë dy hajna. Po i thotë njëri hajn tjetrit:
- A ia vjedhim njërin ka këtij lavërtari?
Hajant merren vesh - njëri del në fund të arës e tjetri rri në krye të arës, ngat malit.
Ky që kish dalë në fund të arës, kur erdhi lavërtari në krye të arës, ia nis e po pisket:
- O, ti seri, - dhe shkarravitej nëpër tokë!
I ndali lavërtari kiet dhe shkoi me vrap në fund të arës, të shihte pse po pisket ai njeri ashtu.
Derisa lavërtari mbërrin në fund të arës, ky hajni tjetër e zgjidh njërin ka dhe hyn në mal.
Po e pyet lavërtari ata që ish duke piskat:
- Çka ke që po pisket kështu?
- Valla, - po i thotë aj, - po bëj seri qysh po lëvron me një ka!
Kthehet ky e po e sheh se në zgjedhë ish veç njëri ka, - e po thotë:
- Vallahi, ti po bën seri, e unë po çuditem qysh nuk e kam pa prej sabahit.